Heb 10 | MED | STEP | Wote, Moses nga mi ik petᵾm kᵾⱡ, uⱡ kupa ingk mat, wote ekit omba ei nga, unt to ropa waka ndurum. Uⱡ kupa mbᵾ, ekit ui nᵾwᵾrᵾm mon! Got kᵾn angge nᵾk, kalk tindiⱡim mundi uⱡ ei, pana ui mbila rᵾk rᵾk etmin. Uⱡ etmin ei ndi, mbi paka rormᵾn wamp mbᵾ, Got kᵾn nondpa ping. Uⱡ ei ndi, numan orunga tᵾpa kun mundi namᵾndrᵾm.

Hebrews 10

Unt Kalk Tindiⱡim Mundrᵾng Uⱡ Ei Ndi, Kapⱡa Iti Nᵾtᵾtᵾm

1 Wote, Moses nga mi ik petᵾm kᵾⱡ, uⱡ kupa ingk mat, wote ekit omba ei nga, unt to ropa waka ndurum. Uⱡ kupa mbᵾ, ekit ui nᵾwᵾrᵾm mon! Got kᵾn angge nᵾk, kalk tindiⱡim mundi uⱡ ei, pana ui mbila rᵾk rᵾk etmin. Uⱡ etmin ei ndi, mbi paka rormᵾn wamp mbᵾ, Got kᵾn nondpa ping. Uⱡ ei ndi, numan orunga tᵾpa kun mundi namᵾndrᵾm. 2 Moses nga mi ik mbᵾ ndi, Got nga mbi paka rondᵾrnᵾm, wamp mbᵾ nga uⱡ kit etmin mbᵾ, kupa etpa eng nondᵾⱡnga ndam, uⱡ kit mat etmin nᵾk, numan ou ndupa pili napilingina, wote kaⱡpa tindiⱡim mundi uⱡ ei pora nilinga. 3 Uⱡ ei mel mon. Pana ui mbila pora, kng kaⱡpa tindiⱡim mundᵾrmᵾn uⱡ ei ndi, wamp mbᵾ nga uⱡ kit mbᵾ, ropᵾl rok piling ei nga ngurmin. 4 Nambuⱡ emel, kng meme na, kng kau pela na mbᵾ nga mema kulk tᵾk, Got kᵾn angge nᵾk, kalk tindiⱡim mundᵾrmᵾn uⱡ ei ndi, wamp mbᵾ nga uⱡ kit etmin mbᵾ, pora ni nandᵾtᵾm mon!

5 Wote, uⱡ puⱡ ila, Kraist ni, mᵾi kona omba etpa kᵾn, Got kundpa, nimba mel,

“Nim ndi, kaⱡpa tindiⱡim mundi uⱡ na, angge nᵾk ngui uⱡ na mbᵾ numan mundi namᵾndᵾn. Wote nim ndi, na nga kᵾng kᵾⱡ tᵾkᵾn kun etkᵾn ngurun. 6 Kng mat tᵾk rat pol mbila, kalk tindiⱡim mundᵾrmin uⱡ mbᵾ kᵾn, wote uⱡ kit mbᵾ pendpa kilinga nᵾk, kalk tindiⱡim mundᵾrmᵾn uⱡ mbᵾ, nim ndi, numan ngui nganggᵾrᵾn mon!” nᵾtᵾm.
7 Wote na ndi, nᵾmp mel,

“Unt Got nga Buk Wingti ila, mi ik nᵾtᵾm ni mel, ‘Akup na ndi, Got nim nga numan ei, pep ruimp pilip ont,’” nᵾtᵾm.

8 Kraist ndi, kuimp tepa nimba mel, “Kaⱡpa tindiⱡim mundi uⱡ, wote Got kᵾn angge nᵾk, mel ngormᵾn uⱡ mbᵾ pora, nim ndi, numan ngui nganggᵾrᵾn. Wote, rat pol wingti ila, kng ndip karmin uⱡ, wote uⱡ kit wak rok, kalk tindiⱡim mundᵾrmin uⱡ mbᵾ, nim ndi, numan ngui nganggᵾrᵾn ku. Wote, mi ik ila, uⱡ mbᵾ iteing nitim ndam kep, Kraist ndi, pilpa kelpa ik kᵾⱡ,” nitim. 9 Wote Kraist ndi, nimba mel, “Na ya ila mor. Na ont ei ndi, omp nim nga numan pin ei mel, pep ruimp pilip ont,” nitim. Ei nga, Got ndi, unt kng kalk tindiⱡim mundᵾk etᵾng uⱡ mbᵾ mundpa kelpa, Kraist nga kaⱡpa tindiⱡim mundrum uⱡ ei, tᵾpa kona koⱡ ila titim. 10 Nambuⱡ emel, Jisas Kraist ndi, Got nga numan pᵾtᵾm uⱡ mbᵾ, pep ropa kᵾn, elim nga kᵾng kᵾⱡ, Got kᵾn tᵾngᵾnda mint, kaⱡpa tindiⱡim mundrum. Uⱡ itim ei ndi, tᵾn wamp mbᵾ pora, Got nga rᵾⱡaip ila, etpa wamp wingti rundrᵾm.

Jisas Nga Kurum Uⱡ Ei Ndi, Tᵾn Nga Uⱡ Kit Mbᵾ, Wak Rundrᵾm.

11 Unt Jura wu pris mbᵾ ndi, ui mbila pora rᵾk rᵾk ok, rat pol wingti ila anggilik, en enim nga kaⱡpa tindiⱡim mundi kongun tenda ni ku rᵾk rᵾk etᵾng. Uⱡ ei ndi, wamp mbᵾ nga uⱡ kit etmin mbᵾ, wak rui nᵾrᵾrᵾm mon!

12 Wote Kraist ndi, el elim nga kᵾng kᵾⱡ wak ropa, kaⱡpa tindiⱡim mundi uⱡ tenda ei mint, etpa uⱡ kit mbᵾ pendpa kitim. Uⱡ kai ei, ui mbila pora tepa mint purum. Wote akup, Got nga ki mbo orunga morum. 13 I etpa moⱡpa pangga, Got ndi, Kraist nga el rui wamp mbᵾ tᵾpa, elim nga kᵾmp puⱡ ila, mondᵾmba ei nga nokundpa morum. 14 Kraist ndi, el elim nga kᵾng kᵾⱡ tᵾngᵾnda mint, kaⱡpa tindiⱡim mundrum. Uⱡ ei ndi, wamp etpa wingti rᵾndrᵾm mbᵾ, rᵾk rᵾk kun kai muⱡeing nimba itim.

15 Wote, Muⱡnga Wingti ei ndi, ik kᵾⱡ tᵾn kundpa nᵾtᵾm. Kuimp tepa nimba mel, Nuim ei ndi, nimba mel,

“Ui ei om ei kᵾn, na nga nᵾmp mᵾi ruimp ik ei, wamp mbᵾ kᵾn, nimp uⱡ ei, na nga mi ik mbᵾ, wamp mbᵾ nga mundmong rukᵾr orunga nᵾmp pendᵾp, wote numan mbo ila, mon rop pindimp,” nᵾtᵾm.

17 Wote aldpa, nimba mel,

“Wamp mbᵾ nga uⱡ kit etmin mbᵾ, wak rondᵾp, wote uⱡ kit min eng pi etmin mbᵾ, na ndi, numan ou ndup pili nᵾpilimp ku,” nᵾtᵾm.

18 Got ndi, wamp mbᵾ nga uⱡ kit etmin mbᵾ, pendpa kitim, wote Got kᵾn angge nᵾk, kaⱡpa tindiⱡim mundi uⱡ ti, aldpa etᵾk, wamp mbᵾ nga uⱡ kit mbᵾ, pendᵾk kiling mel kapⱡa mon!

Tᵾn Got Kᵾn Nondpa Pamin.

19 Wamp angmᵾn, Jisas nga mema oi ndurum uⱡ ei ndi, tᵾn nga uⱡ kit mbᵾ wak rundrᵾm. Ei nga akup, tᵾn Got nga Manga Kᵾkaⱡ Wingti Kupa ila, rukᵾr mbin uⱡ ei nga mundmong ti iti nᵾtmin. 20 Tᵾn kapⱡa, kona wingti kupa ila rukᵾr mbin uⱡ ei, Got kᵾn nondpa muⱡing uⱡ ei nga, nombuⱡa kont ti ropa titim. Kona wingti ila, muⱡ mbal mam ti, manga kumba mel angᵾndᵾtmᵾn ila purum. Muⱡ mbal ei, elim nga kᵾng kᵾⱡ. 21 Tᵾn nga Wu Pris Kuimbal Ou ti morum ei ndi, Got nga manga ila wamp rᵾⱡaip mbᵾ pora nokᵾndrᵾm. 22 Ni kᵾn, Jisas nga mema oi ndurum uⱡ ei ndi, tᵾn nga uⱡ kit rukᵾr orunga mbᵾ ⱡumᵾi rurum. Wote, tᵾn nga kᵾng orunga mbo nu kai ei ndi, ⱡumᵾi rormᵾn. Ei kᵾn, tᵾn nga numan orunga uⱡ kit mbᵾ wak ropᵾn, Got kᵾn minal mondpᵾn pilpᵾn, Got kᵾn nondpa pamin. 23 Nambuⱡ emel, Got nga nimba mᵾi ropa itimp nitim uⱡ kᵾⱡ, ama kupa etmba mint. Ei nga, tᵾn etpa tᵾmba nimbun nokundpᵾn mormᵾn uⱡ ei, ambuⱡpᵾn gi ndupᵾn, mundmong iti nᵾtmin. 24 Ei kᵾn, tᵾn ndi, wamp angmᵾn mbᵾ, kont kᵾⱡpᵾn, numan ngumbun, uⱡ kai mat tᵾp rapᵾndᵾp itᵾmin. 25 Tᵾn Got nga wamp mou rormᵾn uⱡ ei, wamp mat etmin uⱡ ni mel, wak rui nᵾrᵾmin mon. Ei nambuⱡ emel, Nuim ei nga yant omba Ui Ou ei, nondpa enim. Ei nga, tᵾn ndi, wamp mat nimbun ronduⱡ mundpᵾn muⱡmin.

Tᵾn Ndi Got Kangᵾm Ei Tᵾpᵾn Mbuⱡ Ngui Ngᵾngmin.

26 Kraist nga ik kupa ei, pilpᵾn pora ndupᵾn kᵾn, wote wak ropᵾn mundpᵾn kelpᵾn, uⱡ kit mbᵾ aldpa imᵾn ndam, wote kaⱡpa tindiⱡim mundi uⱡ ti ndi, tᵾn nga uⱡ kit mbᵾ, aldpa wak rondᵾmba mel, kapⱡa mon! 27 Wote, tᵾn Got kᵾn el puⱡa wamp muⱡmᵾn ndam, ui mam ti pem ei kᵾn, Got ndi, tᵾn wamp mbᵾ pora, kᵾmp tᵾpa, wote Got tᵾk mbuⱡ ngᵾng wamp mbᵾ, tᵾpa ndip kona ila mundᵾmba. Uⱡ ei nga, tᵾn mundmong etpᵾn muⱡmᵾn. 28 Unt tᵾn pᵾtmᵾn ni, unt Moses nga mi ik kᵾⱡ, wamp ti ndi, ropa puⱡa rurum ndam, wote wamp raⱡ muna raldika ndi molk, kupa em nᵾtᵾng ei kᵾn, wamp ei kont kuⱡi nalk, rok kondrung. 29 Wote, Got Kangᵾm tᵾpa mbuⱡ ngum wamp ei kᵾn, namba uⱡ ti etmba nda? Jisas Kraist nga nimba mᵾi rui mema oi ndurum ei, wamp ei etpa kun kai mundrum. Uⱡ ei tᵾpa mel wei randpa, wote Muⱡnga Wingti wamp pol ti uⱡ ei, nimba kit mondpa etᵾm wamp ei nga, mbun mindil mam ti tᵾmba uⱡ ei, tᵾk mendᵾk pilᵾi! 30 Ei nga, tᵾn pᵾnmin ei, Got ndi, nimba mel,

“Wamp nga uⱡ kit etmin mbᵾ nga punt ropa ngui uⱡ ei, nanim ndi, punt rop nguimp,” nᵾtᵾm. Aldpa nimba mel, “Nuim ei ndi, elim nga wamp mbᵾ, el elim ndi, kᵾmp timp!” nᵾtᵾm.
31 Ei nga, tᵾn Got rᵾk rᵾk kont morum ei nga ronduⱡ ei, wak rumᵾn ndam, tᵾn kit muⱡmin ei nga, pilpᵾn mundmong etpᵾn, elim pilip muⱡmin.

Tᵾn Mondᵾp Pilpᵾn Ronduⱡ Mundᵾp Muⱡmᵾn.

32 Enim unt Got nga rᵾⱡang ei, rukᵾr tᵾtᵾng uⱡ ei mel pilᵾi! Ui ei kᵾn, wamp mat ndi, enim mbun mam mat ngurung. Ei kᵾn, enim ndi, mbun mam mbᵾ tᵾk, ronduⱡ mundᵾk morung. 33 Ui mat kᵾn, wamp mbᵾ ndi, enim tᵾk wamp nga kuimp keta mbila oⱡa angᵾndᵾk, ik kit nᵾk ngᵾk, mbun ngᵾk etᵾng. Wote ui mat kᵾn, wamp mat mbun tᵾk morung mbila, enim kunda molk, mbun mbᵾ tᵾk rapᵾndᵾk etᵾng. 34 Wote enim ndi, kan manga ila petᵾng wamp mbᵾ, kont kolk etᵾng. Ui mat kᵾn, enim nga mel tek morung mbᵾ, roldᵾk tᵾtᵾng ei kᵾn, enim ndi, numan kai pendᵾk wak rorung. Uⱡ etᵾng, ei nambuⱡ emel, enim ndi, pᵾtᵾng ei, enim nga mel kupa ingk mbᵾ, rᵾk rᵾk tetᵾm mint nᵾk pilik etᵾng.

35 Ei nga, unt enim ronduⱡ mondᵾk pᵾtᵾng uⱡ ni, wak rui nᵾrᵾi, mon! Nambuⱡ emel, uⱡ etᵾng ni ndi, enim mel minal mat ting. 36 Enim nokᵾndᵾk molk, ronduⱡ mundᵾk muⱡᵾi! Got nga numan pᵾtᵾm uⱡ mbᵾ pep rᵾi. Wote Got ndi, enim mel kai mat nguimp nitim mel mbᵾ kai ngangga ting. 37 Ei nga, Buk Wingti ila, nimba mel,

“Ui ei ruⱡ etpa pi napᵾtᵾm mon. Uimp nitim wu ei omba mint. Enim nukundi nakᵾndᵾmba mon! 38 Na nga wamp kun kai mbᵾ mondpa pili uⱡ ila kont puk muⱡing. Wote wamp ti, na tᵾpa mbuⱡ ngum ndam, na ndi, wu ei kᵾn numan kit pilimp,” nitim.
39 Wote, tᵾn Got tᵾp mbuⱡ ngumbun, kit muⱡmin wamp kat mon! Tᵾn Got kᵾn mondᵾp pilamina, etpa tangga, kunt muⱡmin wamp kᵾⱡ mormᵾn.